          |
'Gundián. Un achegamento a unha paisaxe natural e humana', en Psicoloxía da USC A
mostra estreada por
Raiceiros no 2008, con motivo do 50 aniversario da inauguración da
ponte ferroviaria do Gundián sobre o río Ulla, pódese ver desde o 10 de
decembro do 2012 na facultade de Psicoloxía da Universidade de
Santiago de Compostela, no Campus Vida, no horario de apertura do
centro. En novembro e parte de decembro a exposición estivo na facultade de Ciencias da Educación.
As pontes sobre o río Ulla, unha descuberta Raiceiros
está a desenvolver ó longo do 2012 un proxecto sobre as pontes
existentes no río Ulla, desde o seu nacemento en Olveda (Antas de Ulla)
ata Catoira. Membros de Raiceiros visitaron xa os lugares onde se
erguen ou erguían máis de 70 destas construcións.
A mostra 'Cántigas da Ulla' estivo no Espazo Activo de San Miguel de Sarandón Raiceiros
colaborou un ano máis co Espazo Activo da Ulla en San Miguel de
Sarandón (Vedra). O pasado 27 de outubro mostrou en Dozar a exposición
'Cántigas da Ulla', en tanto membros da asociación desenvolvían
actividades culturais en distintos puntos do evento.
Presentación de 'Cántigas da Ulla' e 'Coplas ulláns' na Ponte Ulla O
pasado 6 de setembro, antevéspera da romaría do Gundián, Raiceiros
presentou contra as nove da noite as publicacións 'Coplas ulláns' e
'Cántigas da Ulla' na antiga reitoral da Ponte Ulla. Esa xornada e os
días 7 e 8 tamén se puido ver no mesmo lugar a exposición 'Cántigas da
Ulla'.
Participación na ruta de sendeirismo de San Xoán da Cova Varios
membros, amigas e amigos de Raiceiros participaron o sábado 18 de
agosto na ruta de sendeirismo de San Xoán da Cova (Vedra), que
organizou o Concello de Vedra dentro do programa 'Goza do Ulla', que ó
longo do ano contempla rutas en tódolos concellos que baña este río, o
segundo máis caudaloso de Galicia.
Pódense consultar as datas das rutas aquí: http://concellodevedra.com/archivos/u1/Goza_do_Ulla.pdf Pola súa parte, Raiceiros está a traballar nun proxecto sobre as pontes do río Ulla, que pretende dar a coñecer este patrimonio e o seu contorno.
A mostra 'Gundián. Un achegamento a unha paisaxe natural e humana', en Santiago A
mostra estreada por
Raiceiros no 2008, con motivo do 50 aniversario da inauguración da
ponte ferroviaria do Gundián sobre o río Ulla, púidose ver desde o 21
de
novembro do 2011 ata o 30 de xaneiro do 2012 na facultade de Ciencias
da
Comunicación da Universidade de Santiago de Compostela. Pasaron pola
zona da facultade onde se expuxo a mostra unhas 1.200 persoas.
Presentación de 'Cántigas da Ulla' e 'Coplas ulláns' en
Cacheiras (Teo) e na Estrada Tras
falar en Valadares (Vigo) o 27 de marzo do 2011 das súas últimas
publicacións, 'Cántigas da Ulla' e 'Coplas ulláns', Raiceiros deunas a
coñecer o 5 de agosto en Cacheiras (Teo), no marco dun acto
desenvolvido na librería O Trasno Viaxeiro con motivo da presentación
de 'Cantares e desafíos do Entroido',
de Edita Cobas.
O libro de Cobas recolle as súas composicións para o Antroido da
parroquia teense de Oza desde 1970 á actualidade. A imaxe de Héctor
Rodríguez amósanos un momento desta actividade cultural. Así mesmo, as
publicacións de Raiceiros e de Edita Cobas presentáronse na Sala de
Exposicións de Novagalicia Banco na Estrada o pasado 8 de novembro de 2011.
© héctor rodríguez 2011
Proxecto Cántigas da Ulla Teño un amor na montaña, Raiceiros presentou o domingo 19 de decembro do 2010 na Estación do Tren de Santa Cruz de Ribadulla (Vedra) as dúas publicacións que recollen o resultado do proxecto 'Cántigas da Ulla', que incluíu unha primeira fase de recollida de coplas e outras cancións da tradición oral da xente da Ulla, co obxectivo de difundilas despois. A imaxe baixo estas liñas é da sesión de recollida desenvolvida o 13 de maio do 2009 no Centro da Terceira Idade de Vedra.
© raiceiros 2009 Uso didáctico da mostra sobre Gundián no colexio de Oca (A Estrada) A
mostra que conmemora o 50 aniversario do viaduto ferroviario do Gundián
sobre o río Ulla elaborada pola Asociación Raiceiros estivo durante
unha parte do no curso 2009-2010
no colexio de Oca (A Estrada), como complemento do proxecto do centro
destinado a estudar a importancia que tivo na comarca a construción de
infraestruturas ferroviarias.
Santa Cruz de Ribadulla acolleu a mostra sobre Gundián A exposición que conmemora o 50 aniversario do viaduto ferroviario do Gundián sobre o río Ulla elaborada pola Asociación Raiceiros púidose ver en setembro do 2009 na Casa da Cultura de Ortigueira (Santa Cruz de Ribadulla, Vedra). A mostra sobre Gundián, en San Miguel de Castro (A Estrada) A mostra polo 50 aniversario do viaduto ferroviario do Gundián sobre o río Ulla elaborada pola Asociación Raiceiros púidose ver o domingo 12 de xullo do 2009 no local social de San Miguel de Castro (A Estrada), por onde pasou ó redor dun cento de persoas. A exposición, que leva por título 'Gundián. Un achegamento a unha paisaxe natural e humana' estivo en San Miguel de Castro grazas á colaboración da Asociación de Veciños O Castro e do Concello da Estrada. A parroquia estradense de San Miguel de Castro, que é atravesada pola vía férrea Zamora-A Coruña, foi unha das máis involucradas na construción deste viaduto hai medio século pola súa proximidade, razón pola que ducias de veciños participaron nas obras da ponte ou da vía.. Colaboración coa Festa do Viño da Ulla Raiceiros, como fai desde hai anos, colaborou na edición do 2009 da Festa do Viño da Ulla achegando un artigo que se pode ler aqui: http://www.festadovinodaulla.com/?q=gl/node/307 Raiceiros, no encontro EMAX en Santiago Raiceiros asistiu os días 7 e 8 de febreiro de 2009 ó III Encontro-Mostra Asociativa Xuvenil (EMAX) de Galicia e Norte de Portugal, organizado pola Dirección Xeral de Xuventude e Solidariedade da Xunta de Galicia. A sede é o pavillón Multiúsos Fontes do Sar en Santiago. Raiceiros comparte un posto coa Asociación Cultural San Campio de San Miguel de Sarandón (Vedra).
© raiceiros 2009
A mostra sobre Gundián, en Vedra e A Estrada En colaboración co Concello de Vedra, Raiceiros levou a San Miguel de Sarandón o 5 de abril do 2009 a mostra sobre os 50 anos da ponte de Gundián, coincidindo coa celebración da Festa do Viño da Ulla. Posteriormente levouse ó Colexio de Oca (A Estrada), onde rapazas e rapaces puideron coñecer con detalle a riqueza cultural do contorno do Gundián, e iniciarán proximamente un proxecto de recuperación de lendas. Tanto a publicación vencellada a esta mostra, 'Gundián. Un achegamento a unha paisaxe natural e humana' como a anterior publicación de Raiceiros, a guía 'O Val do Ulla. Unha comarca natural' poden mercarse en: - A Estrada: librerías Faro e Alberte Quiñoi - Santiago: librerías Couceiro, Follas Novas e Gallaecia Liber - Teo: librería O Trasno Viaxeiro, de Cacheiras - Vedra: na antiga reitoral da Ponte Ulla, sede da Asociación de Veciños 'Virxe de Gundián' |
